robbik.net

Þrátt fyrir skeflilegar hrakfarir okkar við að fara í Sambíóin síðastliðið sunnudagskvöld tókst það í gærkveldi. Álit mitt á nýja fyrirkomulagi Sambíó er samt hvergi nærri lokið.

Eins og gáfumennið f.willy bendir á í athugasemd sinni er tvöfalt kassakerfi þannig að ekki er hægt að kaupa miða og Prins Póló í sömu kortafærslunni. Eins eru merkingar af skornum skammti þannig að bíógestir líta út eins og lömb á leið til slátrunar þegar þeir standa allir í sömu röðinni meðan aðrir kassar eru tómir.

Þetta er skiljanlegt atferli. Ekki eru kassadömurnar allavegana að benda á að hægt sé að kaupa miða á öllum kössum heldur er betra að hafa röð út úr dyrum.

Í gær ákvað ég að renna við í fyrra fallinu til að tryggja mér miða. Þar sem ég treysti ekki Sambíóunum eftir þessar breytingar ákvað ég að kíkja vel á miðann minn til að fullvissa mig um að ég væri ekki bara að borga 1000 krónur fyrir afrit af ekki neinu.

Það er eins gott að ég gerði það, því þegar kemur að því að labba inn í salinn er þessi miði tekinn af manni. Þetta gefur manni 50/50 möguleika á að fara í réttan sal ef miðinn hefur ekki verið grandskoðaður áður og bókstafur bíósalsins lagður á minnið.

En djöfull var myndin samt góð.

Snemma í gær á annars unaðslegum sunnudegi var lýðræðisleg ákvörðun tekin um að fara í bíó að sjá hina alræmdu leðurblökumynd. Tilhlökkunin var þó nokkur það sem eftir lifði dags.

Er við mættum í Sambíóin hér á Akureyris stundvíslega tímanlega klukkan 19:53 var röð út að dyrum. Það sem vakti athygli okkar var að þetta var röðin í sjoppuna.

Eftir stutta stund áttaði ég mig á því að Sambíón hafa tekið upp þann smáborgarlega og sænska hátt að sameina miðasöluna og sælgætissöluna í eitt guðsvolað kaos. Ég gleymi því seint þegar við félagarnir fórum fyrst í bíó í Skövde á seinni hluta síðustu aldar og náðum ekki upp í nefið á okkur yfir hallærisganginum að hafa miðsöluna og sjoppuna við sama kassa. Þvílíkt og annað eins.

Þarna stendur fólk í mestu makindum meðan það ákveður hvort það vill troða Valencia með hnetum og rúsínum eða Valencia með núggat og hnetum ofan í sitt feita kok meðan á myndinni stendur. Á meðan safnast upp haugur af fólki fyrir aftan sem vill ekkert með popp og kók gera, heldur bara horfa á helvítis myndina.

Eftir að hafa staðið í röð í 15 mínútur var röðin loksins komin að okkur. “2 miða á Dark Knight takk fyrir”. Afgreiðsludaman æpir þá á samstarfskonu sína hvort hún hafi selt síðustu 2 miða sem hún játti með kaldhæðnislegu glotti.

Sjaldan eða aldrei hef ég farið í jafnmikla fýluferð. Hvurslags endemis losara- of fíflaskapsháttur er þetta. Þvílík afturför hjá einu fyrirtæki.

Sambíón fá algjöra falleinkun fyrir þessa nýjung hjá sér. Ég átta mig á því að þau eru að þvinga fólk til þess að kaupa miðana á netinu.

Ég skal bara gera gott betur og horfa á helvítis myndina á netinu og sleppa því að borga Sambíóunum 1000 kall fyrir að leyfa mér að standa í röð.