robbik.net

Gleðilegt ár

robbik — Fri, 02 Jan 2009 17:27:59 +0000

Gleðilegt ár öllsömul.

Kreppulaust 2009!

Davíð veit ekkert

robbik — Thu, 04 Dec 2008 12:04:38 +0000

Komm’on segi ég nú bara og skrifa. Davíð veit akkúrat ekkert um það af hverju Bretar beittu hryðjuverkalögum gegn okkur. Hann veit nákvæmlega jafn mikið um það og vallhumall um eigin tilvist.

Hann er bara að stríða okkur og fjölmiðlum, draga athyglina og eyða tíma frá öðrum málum. Málum sem mögulega væri hægt að fá svör við ef allir eyddu ekki tíma sínum í að elta kalla eins og Davíð.

Gleymum Davíð.

Svartur kassi

robbik — Wed, 26 Nov 2008 23:32:47 +0000

Ég er staddur hér í íbúð í kjallara því sem virðist vera 15.000 fermetra húsnæði með fáguðum svörtum og ryðlitum klæðningum. Ég er einn í þessu húsnæði eftir því sem ég best veit. Þessi svarti kassi er staðsettur í jaðri höfuðborgarsvæðisins og vindurinn hvæsir um alla króka og kima þessa risamannvirkis. Er ég horfi út um gluggann yfir tómt bílastæðið sé ég gríðarlegt skrifstofuhúsnæði sem er sjálfsagt yfir 27.000 fermetrar.

Þessi steypuklumpur gegnt mér hefur enga veggi, heldur einungis hæð eftir hæð af gólfflötum og sverum steypusúlum til að halda þessu uppi.

Það hefur verið hætt við þessa byggingu.

Þið vitið. Sökum kreppunar.

Þetta verður því sjálfsagt einn af stærstu minnisvörðum okkar um þá tíma sem fara nú í hönd.

g-speak

robbik — Fri, 21 Nov 2008 17:55:11 +0000

Nauðsynlegt til að skoða mbl.is og tölvupóstinn…

Click here to view the embedded video.

http://oblong.com/

Lánafarsi

robbik — Thu, 20 Nov 2008 17:16:46 +0000

Það er margt sem jafnvel ég skil ekki í peningamálum þjóðarinnar og lánaveitungum á milli landa. Nú er ljóst að við ætlum að taka nokkrar trilljónir í lán.

Meðal þeirra sem ætla lána okkur eru Bretar og Hollendingar, auðsæilega vegna skulda Icesave. Þannig að þessar þjóðir lána okkur X milljarða sem við skuldum þeim. Hvernig getur einhver verið betur settur eftir það!?

Ef við tækjum okkur til og færum á barinn og þú lánaðir mér 1.200 íslenskar krónur fyrir einum bjór, til þess eins að komast að því að ég neitaði að borga þér tilbaka, myndir þú lána mér aðrar 1.200 íslenskar krónur svo ég gæti borgað þér? Værum við eiginlega ekki bara á nákvæmlega sama stað, nema ég þyrfti að lokum að greiða þér 1.700 íslenskar krónur með vöxtum.

Og hvernig færa menn svona upphæðir á milli landa? Fer sænski fjármálaráðherrann í heimabankann og millifærir nokkuð hundruð milljarða yfir á íslenskan reikning? Kostar ekki nokkrar milljónir í þóknun erlendra seðlabanka fyrir slík millibankaviðskipti? Væri ekki bara betra að einhver færi út og fengi þessa peninga í reiðufé til að losna við slíkt?

Verð bara að fá svör við þessu. Með öllu óþolandi að fjölmiðlar spyrji ekki að svona lykilatriðum.